26-28 მარტს თბილისი ძიუდოს გრანდ-სლემს უმასპინძლებს, რომელსაც გეცოდინებათ გრან-პრიდან სტატუსი აუმაღლდა.
რამდენიმე დღის წინ გავრცელდა სასიხარულო ინფორმაცია, რომ ეს უმნიშვნელოვანესი ტურნირი მაყურებლების გარკვეული რაოდენობით ჩატარდებოდა, თუმცა ვითარება რადიკალურად შეიცვალა და თბილისის პირველი გრანდ-სლემი ცარიელი ტრიბუნების თანხლებით ჩაივლის.
მიზეზი რამდენიმე დელეგაციაში აღმოჩენილი კორონავირუსის ფაქტებია. სწორედ ამის გამო ძოუდოს საერთაშორისო ფედერაციამ მიიღო გადაწყვეტილება ტურნირი უმაყურებლოდ ჩატარდეს.
„მიუხედავად ჩვენი დიდი მონდომებისა, რომ საქართველოში პირველი გრან სლემი ქართველი გულშემატკივრების თანდასწრებით ჩატარებულიყო, რისთვისაც ფაქტობრივად, ყველაფერი იყო გაკეთებული და მიღებული იქნა კომპრომისული გადაწყვეტილება მაყურებლის გარკვეული რაოდენობის დასწრების შესახებ, სამწუხაროდ უნდა გაცნობოთ, რომ დელეგაციებში დაფიქსირებული კოვიდშემთხვევების გამო, ძიუდოს საერთაშორისო ფედერაციამ შეჯიბრების კვლავ მაყურებლის გარეშე ჩატარების გადაწყვეტილება მიიღო. უკვე შეძენილი ბილეთების თანხა გულშემატკივრებს ეტაპობრივად უკან დაუბრუნდება“ – ნათქვამია ოფიციალურ განცხადებაში.
