ფეხბურთის ქომაგებისთვის კლაუდიო რანიერის წარდგენა საჭირო არ უნდა იყოს. გამოცდილმა იტალიელმა სპეციალისტმა კარიერის მანძილზე არაერთ წარმატებას მიაღწია, რომელთაგან ყველაზე გამორჩეული უდავოდ 2016 წელს „ლესტერთან“ ერთად მოპოვებული პრემიერლიგის ჩემპიონობაა.
ამჟამად რანიერი „საპმდორიაში“ მუშაობს, თუმცა სეზონის ბოლოს გენუურ გუნდს დატოვებს. ამის შესახებ იტალიელმა მწვრთნელმა თავად განაცხადა.
კლაუდიო რანიერი „სამპდორიას“ თავაწეული ტოვებს. მიმდინარე სეზონში გენუელები დამაჯერებლად თამაშობდნენ და ევროსაგზურისთვისაც იბრძოდნენ.
სავარაუდოდ, იტალიელი სპეციალისტი უსაქმოდ დიდხანს არ დარჩება. მისი სამსახურით არაერთი გუნდია დაინტერესებული. უმეტესად იტალიური გუნდები – „პარმა“ და „კალიარი“, თუმცა არის ფრანგული „ლიონის“ და მექსიკური „მონტერეის“ ვარიანტებიც.
იტალიური მედია ვარაუდობს, რომ რანიერი დიდი ალბათობით „კალიარიში“ წავა, სადაც ის შორეულ ოთხმოციანებში მუშაობდა და სარდინიული გუნდი მესამე დივიზიონიდან სერია ა-ში აღაზევა.
ყველაზე ნაკლებად მოსალოდნელი მექსიკაში გადაბარგებაა, რადგან სხვა კონტინენტზე წასვლა რანიერის დიდად არ ეპიტნავება.
უდავოდ საინტერესო იქნება კლაუდიო რანიერის ფრანგულ „ლიონში“ ხილვაც.
მოკლედ, დაველოდოთ მოვლენების განვითარებას.
