ჩოგბურთის და ზოგადად ქართული სპორტის გულშემატკივრებს ეცოდინებათ, რომ ხანგრძლივი პაუზის და წაგებათა სერიის შემდეგ, როგორც იქნა ნიკოლოზ ბასილაშვილმა მოიგო და დოჰას უპრესტიჟულეს ტურნირზე პირველი წრე გადალახა. ჩვენებურმა 3 სეტიან ბრძოლაში ავსტრალიელი ჯეიმს მილმანი დაამარცხა.
მეტოქის ლოდინი კი ერთი დღე მოუხდა, რადგან სავარაუდო მოწინააღმდეგეთაგან ერთ-ერთი, კერძოდ კი ბორნა ჩორიჩი შეჯიბრიდან მოიხსნა და ორგანიზატორებმა ის სლოვაკი ნორბერტ გომბოშით ჩაანაცვლეს, რომელიც ტუნისელ მალეკ ჯაზირს დაუპირისპირდა. სწორედ ამათ შორის გამარჯვებულს უნდა გამოერკვია ბასილაშვილის მომავალი მეტოქის ვინაობა და ის მალეკ ჯაზირი იქნება.
ტუნისელი ჩოგბურთელი რეიტინგის 262-ე ჩოგანია და ამითაც ნათელია, რომ წყვილის ფავორიტად წესით ნიკოლოზ ბასილაშვილი ითვლება, თუმცა გადაჭრით ვერაფერს ვიტყვით, რადგან ჩვენებურსაც კარიერის საუკეთესო პერიოდი არ უდგას. ისე კი ქართველი და ტუნისელი მეჩოგნეები ერთმანეთს ერთხელ შეხვედრიან. ეს 2018 წელს პეკინის ტურნირზე მოხდა, რომელიც ბასილაშვილის ტრიუმფით დასრულდა.
ნიკოლოზ ბასილაშვილის და მალეკ ჯაზირის დაპირისპირება 10 მარტს თბილისის დროით 18:30 წუთზე არის ჩანიშნული, გამარჯვებული კი დიდი ალბათობით როჯერ ფედერერს დაეჯახება თუ შვეიცარიელი თავისხმრივ დანიელ ევანსს დაამარცხებს.