ბუდაპეშტში მიმდინარე ძიუდოისტთა მსოფლიო ჩემპიონატის მე-7 დღე ქართული დელეგაციისთვის წარუმატებელი გამოდგა. მძიმე წონით კატეგორიაში ბრინჯაოს მედლის მოპოვების შანსი გელა ზაალიშვილს ჰქონდა, თუმცა ქართველმა ჯუდოკამ გადამწყვეტი ბრძოლა უკრაინელ იაკივ ხამოსთან დათმო და მე-5 ადგილი დაიკავა.
ქართველმა ძიუდოისტმა ამ დაპირისპირებამდე საკმაოდ ძლიერი მეტოქეები დაამარცხა. 1/16-ში სენეგანელ ნდიაიეს შეხვედრა ორი ვაზარით შემოუტრიალა. შემდგომ ეტაპზე ავსტიელი ალერსტორფერი იპონით დაამარცხა. 1/4 ფინალში მსოფლიოს ჩემპიონატის პრიზიორი, როი მეიერი დაამარცხა. ნახევარფინალში კი სამწუხაროდ რუს ტამერლან ბაშავეთან დამარცხდა.
ინდივიდუალურ ასპარეზობაში საქართველოს ნაკრებმა 4 მედალი მოიპოვა და არაოფიციალურ გუნდურ ჩათვლაში მამაკაც ძიუდოისტებს შორის პირველი ადგილი დაიკავა.
მსოფლიოს ჩემპიონი ლაშა შავდათუაშვილი გახდა. ტატო გრიგალაშვილმა ვერცხლი, ვარლამ ლიპარტელიანმა და ილია სულამანიძემ კი ბრინჯაოს მედლები მოიპოვეს.
მსოფლიო პირველობის დასვკნით დღეს შეჯიბრი გუნდურ ჩათვლაში გაიმართება, სადაც საქართველოს ნაკრები უძლიერესი შემადგენლობით იასპარეზებს.
