ბრალდება და თვითმკვლელობა

მხატვრულ ტანვარჯიშში, გოგონებში ამერიკის შეერთებული შტატების ნაკრების ყოფილმა მთავარმა მწვრთნელმა ჯონ გედერტმა სიცოცხლე თვითმკვლელობით დაასრულა.

63 წლის მამაკაცს, ქვეყნის პროკურატურა არაერთ დანაშაულში დებდა ბრალს, მათ შორის სექსუალური ხასიათის.

„დღეს, აღმოჩენილ იქნა ჯონ გედერტის ცხედარი. მან თავი მოიკლა. ეს მეტად სამწუხარო ფაქტია“ – აღნიშნავს მიჩიგანის შტატის მთავარი პროკურორი დანა ნესელი.

ამ განცხადებამდე ერთი დღით ადრე კი ნესელმა, მწვრთნელს შემზარავ დანაშაულში დასდო ბრალი. კერძოდ, ჯონ გედერტს შეგირდების მიმართ სექსუალურ და ფსიქოლოგიურ ძალადობაში ადანაშაულებდნენ. პროკურატურის მტკიცებით ჯონ გედერტი ათობით ახალგაზრდა სპორტსმენს დიდი წნეხის ქვეშ ამყოფებდა. ვარჯიშების დროს ის ტანმოვარჯიშეებს უყვიროდა, მათ მიმართ მკაცრ მეთოდებს იყენებდა, იგნორირებას უკეთებდა ტრავმებს და არც სექსუალური ხასიათის ქმედებებს ერიდებოდა.

გარდა ამისა, ჯონ გედერტს ცრუ ჩვენებასა და ადამიანებით ვაჭრობაშიც ადანაშაულებდნენ. პროკურატურის თქმით, ის ექიმ ლარი ნასარას აფარებდა ხელს, რომელიც პედოფილი იყო და ასევე 10 წლის მანძილზე არასრულწოვანებს ყიდდა.

ჯონ გედერტის სასამართლო პროცესი 25 თებერვალს უნდა დაწყებულიყო. ბრალის დამტკიცების შემთხვევაში მას მინიმუმ 35 წლიანი პატიმრობა ემუქრებოდა.