ლეგენდარულმა ნიდერლანდელმა ფეხბურთელმა არიენ რობენმა საფეხბურთო კარიერა დაასრულა.
რობენი ფეხბურთიდან ჯერ კიდევ 2019 წელს წავიდა, მაგრამ გასულ ზაფხულს “გრონინგენის” წინადადება მიიღო და დაბრუნდა, მაგრამ ამჯერად, წასვლა საბოლოოდ გადაწყვიტა. მიზეზი, რა თქმა უნდა, ისევ ტრავმებია, რის გამოც რობენმა გასულ სეზონში მხოლოდ 7 თამაშის ჩატარება მოახერხა.
“საფეხბურთო კარიერის დასრულება გადავწყვიტე, ეს ძალიან რთული არჩევანია. მხარდაჭერისთვის ყველას მადლობას გიხდით. იმედგაცრუებული ვარ ტრავმების გამო. ვიცოდი, რომ ეს შეიძლებოდა მომხდარიყო, მაგრამ გამოწვევა მაინც მივიღე. თავს კარგად და თავდაჯერებულად ვერ ვგრძნობდი”, – თქვა რობენმა.
არიან რობენის კარიერა სწორედ გრონინგენში დაიწყო, შემდეგ “პსვ ეინდჰოვენში”, “ჩელსისა” და “რეალში” ითამაშა, მაგრამ კარიერის საუკეთესო პერიოდი 2009-2019 წლებში მიუნხენის “ბაიერნში” გაატარა, სადაც 309 შეხვედრაში 144 გოლი გაიტანა.
ნიდერლანდების ნაკრებში არიენ რობენმა 2003-2017 წლებში 96 თამაშში 36 გოლი გაიტანა, 2010 წლის მუნდიალზე ვერცხლის, ხოლო 2014 წელს ბრინჯაოს მედალი მოიპოვა.
