დიდმა ბრიტანეთმა უეფას საკმაოდ საინტერესო და დამაინტრიგებელი წინადადებით მიმართა. როგორც პოპულარული გამოცემა Sunday Time-ი იუწყება, ინგლისელებმა ევროპული ფეხბურთის მმართველ ორგანოს შესთავაზეს კონტინენტის პირველობა თავიდან ბოლომდე მათთან ჩაატაროს.
ალბათ შეხსენება არ გჭირდებათ, რომ პანდემიის გამო უეფამ ევროპის ჩემპიონატი 2021 წლისთვის გადაავადა, მაგრამ სახელწოდება შეუნარჩუნა და ის ისტორიას მაინც „ევრო 2020“-ად შემორჩება.
კორონავირუსის გამო მსოფლიოში შექმნილი ვითარებიდან გამომდინარე, ინგლისელები ვარაუდობენ, რომ ტურნირის ერთ ქვეყანაში გამართვა უფრო უპრიანი იქნებოდა, ვიდრე მონაწილე გუნდების ევროპის 12 ქალაქში მიმოფანტვა. თან ინგლისური მედიის ცნობით დიდი ბრიტანეთის მთავრობამ უკვე შეიმუშავა გეგმა, რომლის მიხედვითაც გულშემატკივრები ტრიბუნებს უკვე მაისის თვიდან დაუბრუნდებიან. იმის გათვალისწინებით, რომ სხვა ქვეყნებში შესაძლოა ადგილობრივმა ხელისუფლებამ ქომაგებს ამის ნება არ დართოს, არის საშიშროება, რომ ევროპის ჩემპიონატი უმაყურებლოდ ჩატარდეს, რაც ბუნებრივია მას ხიბლს და პეწს დაუკარგავს.
ახლანდელი გეგმის მიხედვით, ლონდონმა და კერძოდ „უემბლიმ“ ევროპის ჩემპიონატის ნახევარფინალს და ფინალს უნდა უმასპინძლოს.
ვნახოთ რა გადაწყვეტილებას მიიღებს უეფა და დათანხმდება თუ არა ინგლისელთა წინადადებას.
