ქართულ რაგბში შექმნილ რბილად რომ ვთქვათ არასახარბიელო სიტუაციას ბოლო არ უჩანს. წელიწადზე მეტია რაგბის კავშირში ვითარება არეულია და გვირაბის ბოლოსაც სინათლე არ ჩანს.
რამდენჯერმე გადადებული საპრეზიდენტო არჩევნების შემდეგ 30 დეკემბერს თითქოს ყველაფერი დასრულდა, როდესაც რაგბის კავშირის თავკაცად ირაკლი აბუსერიძე აირჩიეს, თუმცა ის საჯარო რეესტრმა არ დაარეგისტრირა და ვითარება კვლავ აიბურდა. 24 თებერვალს ხელახალი საარჩევნო ყრილობა ჩაინიშნა, მანამდე კი ყოფილი პრეზიდენტი გოჩა სვანიძე პროლურატურაში გამოკითხვაზე დაიბარეს.
მოკლედ, საგა კვლავ გრძელდება. „პრაიმსპორტი“ ვეტერან ქუთაისელ მორაგბეს ტარიელ მარგველაშვილს დაუკავშირდა და შექმნილი ვითარება შეაფასებინა.
-რა უნდა ვთქვა? რაც ხდება მხოლოდ ერთი სიტყვით შემიძლია შევაფასო – სირცხვილი. მე პირველი თაობის მორაგბე ვარ და გული მტკივა ჩემ საყვარელ სპორტში ასეთი ვაკხანალია რომ ტრიალებს. რაგბი ჩვენთან ყოველთვის ვაჟკაცობასთან და რაინდობასთან ასოცირდებოდა, ახლა კი ენითაუწერელი სიბიძნურეები ხდება. ყოფილ მორაგბეს კი არა, ვინმეს შეიძლება ეს მოსწონდეს?
-რა თქმა უნდა არა. და მაინც, რას მიაწერთ შექმნილ ვითარებას?
-ერთი ვიცი დანამდვილებით. 55 წელია რაგბში ვარ და ასეთი სამარცხვინო პერიოდი არასდროს ყოფილა. ტელევიზორის ჩართვა აღარ მინდა. ყველა მხარეს მეგობრებს და ჩემი პლეადის მორაგბეებს ვხედავ. ისიც ვერ გავიგე პროკურატურიდან გამოსულ გოჩა სვანიძეს გარეთ გულშემატკივრად ირაკლი აბუსერიძე რომ დახვდა, არადა მილიონების შეჭმას აბრალებდა.
-გამოსავალს რაში ხედავთ?
-სიმშვიდეში. სიტუაციის ესკალაციას არასდროს არცერთი დარგისთვის სიკეთე არ მოუტანია. 24 თებერვალს ხომ ჩაინიშნა კიდევ ერთი არჩევნები? უკვე სათვალავიც კი ამერია მერამდენეა. მე არცერთი კანდიდატის წინააღმდეგი არ ვარ. ვისაც აირჩევენ დაანებონ თავი. ერთხელ და სამუდამოდ მორჩეს ეს არეულობა და სარაგბო ცხოვრება ნორმალურ კალაპოტს დაუბრუნდეს.
