საქართველოს მორაგბეთა ეროვნულ ნაკრებსა და სამხრეთ აფრიკას შორის 9 ივლისს გასამართი მეორე ამხანაგური მატჩი გაუქმდა. მიზეზი კორონავირუსია, რომელმაც ორივე გუნდის ბანაკს შეუტია.
გავრცელებული ინფორმაციით, ბოლო საათებში ჩატარებული გეგმიური ტესტირების შედეგად, ვირუსზე დადებითი პასუხი როგორც საქართველოს, ისე სამხრეთ აფრიკის ნაკრებების მოთამაშეებს აღმოაჩნდათ. პროტოკოლის გათვალისწინებით, უსაფრთხოების ზომებიდან გამომდინარე ორ დღეში გასამართი შეხვედრა გაუქმდა.
რაგბის კავშირის წარმომადგენლის ინფორმაციით, ინფიცირებული ბორჯღალოსნები თავს კარგად გრძნობენ და იზოლირებულ გარემოში იმყოფებიან. მათი ჯანმრთელობის მდგომარეობაზე ნაკრების სამედიცინო პერსონალი და კვალიფიციური სპეციალისტები 24-საათიან რეჟიმში ზრუნავენ.
