ქართველი გულშემატკვირები არ ვართ განებივრებულები იტალიის ჩემპიონატში ქართველი ფეხბურთლების ხილვთ. კახა კალაძის და ლევან მჭედლიძის შემდეგ, იტალიის ნებისმიერი რანგის დივიზიონში ქართული გვარისთვის ყური ალბათ არ მოგვიკრავს.
თუმცა, ცოტა ყურადღებით თუ გადავავლებთ თვალს ქვედა დივიზიონებს, ქართულ გვარებს ნამდვილად აღმოვაჩენთ. ერთ-ერთი ასეთი კი სერია D-ში მოთამაშე „კასარანოს“ მცველი, ლუკა ლობჯანიძეა.
ლუკა 20 წლისაა და უკვე 4 წელია რაც იტალიაში ცხოვრობს. მისი გუნდი მართალია იტალიის რანგით მე-4 დივიზიონში ასპარეზობს, თუმცა სერიოზული ამბიციები აქვთ და სერია C-ში აღზევებისთვის აქტიურად იბრძვიან. ამჟამად „კასარანო“ სერია D-ს H ჯგუფში გამოდის. სერია C-ში გადასასვლელ ფლეი-ოფში ქართველი ფეხბურთელის გუნდი „პიჩერნოსთან“ მატჩში მინიმალური სხვაობით, 1:0 დამარცხდა, თუმცა სერია C-ში გადასვლის შანსი მაინც აქვს. „კასარანომ“ რეგულარუს სატურნირო ცხრილში მე-5 ადგილი დაიკავა.
„პრაიმ სპორტი“ ლუკა ლობჯანიძეს იტალიაში დაუკავშირდა და მასთან მცირე ინტერვიუ ჩაწერა:
– „კასარანოში“ როგორ მოხვდი?
– აგენტი დამეხმარა, რომელიც იტალიაში ჩამოსვლის პირველივე დღიდან ჩემს გვერდით დგას.
– რა პოზიციაზე თამაშობ?
– ცენტრალური მცველი ვარ.
– კლუბთან კონტრაქტი რომელ წლამდე გაკავშირებს და აპირებ თუ არა კლუბის გამოცვლას?
– 1+1 სისტემით მაქვს კონტრაქტი გაფორმებული და წელს გადავწყვეტ დავრჩები თუ არა კიდევ ერთი წლით. რაღაც ვარიანტები არის, მაგრამ ჯერ ადრეა ამაზე საუბარი.
– კლუბის მიზნები გაგვაცანი…
– „კასარანოს“ დიდი სამომავლო პროექტი აქვს. ამ სეზონში ჩემპიონატის ყველაზე ძლიერი ფეხბურთელებით ვიყავით დაკომპლექტებული, თუმცა რაღაც მიზეზების გამო ჩემპიონები ვერ გავხდით. ფლეი-ოფში გამოვარდით, მაგრამ აღზევების შანსი მაინც გვაქვს. აქაური წესებით, გუნდი რამდენიმე კრიტერიუმს უნდა აკმაყოფილებდეს და მას სერია C-ში ასვლის უფლებას მისცემენ. ჩვენ ყველა კრიტერიუმს ვაკმაყოფილებთ და სწორედ ამიტომ, შესაძლოა მაღალ დივიზიონში ავღზევდეთ.
– მწვრთნელთან როგორი ურთიერთობა გაქვს?
– ამ სეზონში კარგი ურთიერთობა მქონდა. დიდხნიანი ტრავმიდან დავბრუნდი, მენდო და სათამაშო დრო მომცა, რაც რა თქმა უნდა ძალიან მნიშვნელოვანია.
– იტალიაში წასვლამდე სად თამაშობდი?
– ავაზას სკოლაში გავიზარდე და შემდეგ ცხინვალის დუბლების შემადგენლობაში გამოვდიოდი.
– უკვე დიდი ხანია იტალიაში ცხოვრობ. ყველაზე მეტად რა გაგიჭირდა?
– 4 წელია იტალიაში ვცხოვრობ. თავიდან შეგუება რა თქმა უნდა ძნელია – ახალი ენა, ახალი გარემო, ახალი ხალხი… აქ, რომ ჩამოვედი ენაც არ ვიცოდი და ხალხთან ურთიერთობაც მიჭირდა. შემდეგ ნელ-ნელა შევეჩვიე, იტალიურიც ვისწავლე და დღეისთვის თავს ძალიან კარგად ვგრძნობ.
– რა განსხვავებაა ქართულ და იტალიურ ფეხბურთს შორის?
– ძალიან დიდი. აქ უფრო ტაქტიკური და ძალისმიერი ფეხბურთია. ძალიან დიდი დრო ეთმობა ტაქტიკურ და ფიზიკურ მომზადებას.
– რა არის შენი მიზანი?
– მიზანი კარიერაში ყოველთვის მაღალ საფეხურზე ასვლა და განვითარებაა. ჯერ არაფრისთვის მიმიღწევია და ვეცდები დიდი ფეხბურთი ვითამაშო.
– ოცნება?
– საქართველოს ნაკრებში და სერია A-ში თამაში.
– დღევანდელ ნაკრებზე რას იტყოდი?
– საქართველოს ნაკრებმა ძალიან მოუმატა, განვითარების სწორ გზაზე ვდგავართ. უბრალოდ, ახლა მთავარია ეს კარგი თამაში შედეგებშიც გარდაისახოს.
– ასაკობრივ ნაკრებებში თუ გითამაშია?
– იყო საუბრები და მოლაპარაკებები, მაგრამ არ მითამაშია.
– ფედერაციასთან კომუნიკაცია თუ გქონია?
– საუბრების დონეზე კი, მაგრამ ჯერჯერობით კონკრეტული არაფერი ყოფილა.
– ევროპის ჩემპიონატზე რას იტყოდი, ვის მიიჩნევ ფავორიტად?
– ფავორიტი ალბათ საფრანგეთია, ყველაზე ძლიერი შემადგენლობა მათ ჰყავს. ასევე იტალიას, რომელიც ძალიან შეკრული გუნდია. მგონია, რომ წელს ჩემპიონობაზე ისინიც გაიწევენ.
