ეჭვგარეშეა, რომ ფეხბურთის მოყვარულთ არა მხოლოდ სპორტული ბატალიების და უპირველესად ევროპის ჩემპიონატის მხრივ, სატრანსფერო კუთხითაც ძალზედ ცხელი ზაფხული ელით.
ამას წინათ გამცნეთ, რომ ჯანლუიჯი დონარუმას „მილანიდან“ წასვლა თითქმის გადაწყვეტილი ამბავიაო. როგორც ჩანს მართლაც ასეა და ნიჭიერი კიპერი „როსონერის“ რამდენიმე დღეში დატოვებს.
იტალიის ნაკრების 22 წლის მეკარე „მილანში“ 2015 წლიდან თამაშობს და გუნდის მაისური 251 მატჩში მოირგო, თუმცა ყველაფერს აქვს დასაწყისი და დასასრული. დონარუმას ერაც „მილანში“ ბოლო დღეებს ითვლის.
„გადაწყვეტილება მიღებულია. ჯანლუიჯი დონარუმა მილანს მომდევნო კვირაში ოფიციალურად დაემშვიდობება. ეს ამბავი გუნდის სპორტულმა დირექტორმა პაოლო მალდინიმაც დაადასტურა. მილანმა ჯანლუიჯის შემცვლელს „ლილში“ უკვე მიაგნო. გუნდი 13 მილიონად მენიოს იყიდის“ – წერს ცნობილი იტალიელი სპორტული ჟურნალისტი ფაბრიციო რომანო ტვიტერის საკუთარ გვერდზე.
