სულ მალე, კერძოდ კი 30 მაისს წლის მეორე დიდი სლემის გათამაშება – როლან გაროსი აიღებს სტარტს. პარიზული მეიჯორისთვის ჩოგბურთელები ბოლო რეპეტიციას მომდევნო კვირაში ბელგრადსა და პარმაში გასამართ 250-იანი კატეგორიის ტურნირებზე გაივლიან.
ქართველ გულშემატკივართა ინტერესი ბუნებრივია ნიკოლოზ ბასილაშვილისკენ არის მიმართული, რომელიც ძალებს სერბეთის დედაქალაქში მოსინჯავს. ნიშანდობლივია, რომ ბელგრადში ასევე ითამაშებს მსოფლიოს პირველი ჩოგანი ნოვაკ ჯოკოვიჩი. ტურნირზე ნოლე თავისთავად პირველ ნომრად არის განთესილი, ხოლო ბასილაშვილს ორგანიზატორებმა მესამე განთესვა მიანიჭეს.
შედგა წილისყრაც და გაირკვა, რომ ნიკოლოზ ბასილაშვილი, როგორც ერთ-ერთი განთესილი ტურნირში მეორე ეტაპიდან ჩაერთვება. რაც შეეხება მის მეტოქეს, ის ლასლო ჯერე ან კვალიფიკაციიდან გადმოსული რომელიმე ჩოგბურთელი იქნება.
ბელგრადის ტურნირი, რომლის საპრიზო ფონდიც 511 ათასი ევროა 23 მაისს დაიწყება.
