ევროპის სუპერლიგის თემა საფეხბურთო თემის დღის წესრიგში ალბათ კიდევ დიდხანს იქნება. მართალია, პროექტი შეჩერდა, თუმცა ამ ამბავს გაგრძელება რომ აუცილებლად მოჰყვებოდა ძნელი მისახვედრი არ უნდა ყოფილიყო.
სუპერლიგის მთავარი სულისჩამდგმელი და პრეზიდენტი ფლორენტინო პერესი გაჩერებას და იმასთან შეგუებას, რაც მოხდა არ აპირებს და უეფასთვის სასამართლოში ჩივილს აპირებს. მისი თქმით, სუპერლიგა როგორც იურიდიული ორგანიზაცია ფუნქციონირებას ჩვეულებრივად აგრძელებს და არ მომკვდარა.
იტალიური მედიის მტკიცებით, ფლორენტინო პერესი დავას სასამართლოში გააგრძელებს და თავისას მაინც გაიტანს. „რეალის“ პრეზიდენტის თქმით, უეფა ანტიმონოპოლისტურ კანონს არღვევს, რადგან ალექსანდერ ჩეფერინს და კომპანიას არ აქვთ უფლება ევროპაში ყველა საკლუბო ტურნირის ზედამხედველები და ორგანიზატორები იყვნენ.
დაველოდოთ მოვლენების განვითარებას და იმასაც თუ რას გამორჩება ფლორენტინო პერესი სასამართლოში ჩივილით, რომელიც სავარაუდოდ დროში დიდხანს გაიწელება.
