ქართული სპორტისთვის და კერძოდ ჩოგბურთისთვის ისტორიული ამბავი მოხდა დოჰას უპრესტიჟულეს ტურნირზე. ნიკოლოზ ბასილაშვილმა ყველა დროის ერთ-ერთი საუკეთესო ჩოგბურთელი როჯერ ფედერერი დაამარცხა.
შვეიცარიელი მაესტრო კორტს 400 დღიანი პაუზის შემდეგ დაუბრუნდა, თუმცა ეს ფაქტი ჩვენებური მეჩოგნის ამ წარმატებას სულაც არ აკნინებს.
როჯერ ფედერერმა მატჩისშემდგომი კომენტარის გარდა, დოჰას ტურნირზე მისი თამაში ტვიტერის საკუთარ გვერდზეც შეაფასა და სამომავლო გეგმებზეც დაწერა.
„საერთო ჯამში დოჰაში კარგი შეგრძნებებით ვტოვებ. რა თქმა უნდა, სასიამოვნო იქნებოდა ტურნირს არ გამოვთიშულიყავი, მაგრამ მეტოქემ არაჩვეულებრივი თამაში დამიპირისპირა.
მთავარია, რომ დაბრუნება მაინც შედგა. დოჰაში გამართულმა ორმა თამაშმა მაჩვენა, რომ ისევ ვარჯიშებს უნდა მივუბრუნდე და კონდიციები ბოლომდე აღვიდგინო. ამიტომაც, დუბაის ტურნირზე აღარ ვითამაშებ“ – აღნიშნა როჯერ ფედერერმა.
