10 იანვარს, ბელგიის ჩემპიონატის მორიგ ტურში „გენტი“ სტუმრად „ბეერსხოტს“ დაუპირისპირდება. ეს მატჩი დიდად არაფერში დაგვაინტერესებდა, რომ არა გიორგი ჩაკვეტაძე, რომელიც „გენტის“ ფეხბურთელია, თუმცა სექტემბრის შემდეგ არც კლუბში და არც ნაკრებში ტრავმის გამო აღარ უთამაშია.
ქართველი ლეგიონერის ჯანმრთელობის მდგომარეობაზე წუხს „გენტის“ მთავარი მწვრთნელი ჰანს ვანჰაეზენბრუკიც, რომელმაც ჩაკვეტაძის შესახებ იქაურ მედიასთან კომენტარი გააკეთა:
„გიორგი რამდენიმე დღეს კიდევ დაისვენებს და შემდეგ გუნდთან ერთად ვარჯიშს განაახლებს. ის მძიმე ტრავმის შემდეგ მსუბუქად ვარჯიშობს, მაგრამ ვატყობთ, რომ დისკომფორტს ისევ გრძნობს. ვითარებას დავაკვირდით და გადავწყვიტეთ, მისთვის დატვირთვები ამ ეტაპზე თავიდან აგვერიდებინა. ვფიქრობ, ის ოპტიმალურ ფორმაში ჩასადგომად მუშაობას მალე დაიწყებს.
საქმე უცნაურ დაზიანებასთან გვაქვს, თუმცა საბედნიეროდ სერიოზული აღარაფერია და არც ქირურგიული ჩარევაა საჭირო. ექიმებმა მის სამკურნალოდ სხვადასხვა მეთოდები გამოიყენეს. ერთი შეხედვით ის მოედანზე გასასვლელად უკვე მზადაა, მაგრამა რ გვინდა ავჩქარდეთ. გიორგი გუნდისთვის მნიშვნელოვანი და საჭირო ფეხბურთელია“ – აღნიშნა „გენტის“ მთავარმა მწვრთნელმა.
ჩვენის მხრივ კი დავამატებთ, რომ ჩაკვეტაძე არა მხოლოდ „გენტის“, ეროვნული ნაკრებისთვისაც ერთ-ერთი საკვანძო ფიგურაა და იმედია მარტის ოფიციალურ მატჩებამდე მომჯობინდება.
