მიმდინარე ევროპის ჩემპიონატზე, ჯგუფური ეტაპის რიხით გავლის შემდეგ, პლეიოფში იტალიის ნაკრები კინაღამ დაამუხრუჭეს. ლონდონის „უიმებლის“ სტადიონზე გამართულ 1/8 ფინალში, „სკუადრა აძურას“ ავსტრიის წინააღმდეგ საკმაოდ რთული მატჩის ჩატარება მოუხდა.
ძირითადმა 90 წუთმა გამარჯვებული ვერ გამოავლინა და გუნდებმაც უგოლო ფრე ითამაშეს, თუმცა დამათებით დროში რობერტო მანჩინის შეგირდებმა იმძლავრეს და მეტოქე გატეხეს – 2:1.
მატჩის შემდეგ კმაყოფილი ჩანდა იტალიელთა მთავარი მწვრთნელი რობერტო მანჩინი.
„მარტივ გასერინებას არც ველოდით. წინასწარ ვიცოდით, რომ რთული მატჩი გველოდა. იმასაც არ გამოვრიცხავდი, რომ ავსტრიასთან დაპირისპირება გაცილებით ძნელი ყოფილიყო, ვიდრე ეს მეოთხედფინალში იქნება.
მშრალ სერიას დიდ ყურადღებას არ ვაქცევდი. რა თქმა უნდა, ვიცოდი რომ ადრე თუ გვიან ვიღაც გაგვიტანდა.
სიმართლე ითქვას, გოლები ძირითად დროში უნდა გაგვეტანა და საქმე ასე არ გაგვერთულებინა, მაგრამ მთავარი მაინც ის არის, რომ მომდევნო ეტაპზე გავედით, რაც სავსებით ლოგიკურია, რადგან ეს დავიმსახურეთ.
„უემბლი“ დიდებული სტადიონია. ვისურვებდი აქ ისევ დავბრუნდეთ, რისთვისაც კიდევ 2 მატჩის მოგება გვინდა“ – აღნიშნავს რობერტო მანჩინი.
