უახლოეს პერიოდში საქართველოს ფეხბურთის ფედერაცია ქალთა ფეხბურთის მიმართულებით ორ ახალ პროექტს დაიწყებს. ინფორმაცია სფფ-ის დღევანდელ ყრილობაზე გაჟღერდა.
ორივე პროექტი გოგონებში ფეხბურთის მასობრიობის გაზრდას ისახავს მიზნად. ამასთან დაკავშირებით ყრილობაზე ფეხბურთის განვითარების მენეჯერმა, ქეთი ყიფიანმა დეტალურად ისაუბრა:
„ეს ოთხწლიანი პროექტია და 7 მიმართულებას მოიცავს. მნიშვნელოვანია, გოგონები მაქსიმალურად პატარა ასაკიდან ჩაერთონ. შესაბამისად, სფფ იწყებს ორ ახალ პროექტს – პირველი არის „პლეიმიექერსი“, რომელიც უეფა-ს და დისნეის ერთობლივი პროექტია და ფეხბურთში 5-დან 8 წლამდე ასაკის გოგონების ჩართულობას ითვალისწინებს. მეორეა „ფეხბურთი სკოლებში“, რომელიც საჯარო სკოლებში 10 წლიდან ბიჭების და გოგონების ფეხბურთში ჩართულობას გულისხმობს.
ამ პროექტით მოხდება ტალანტების აღმოჩენა და განვითარება, რაც ხელს შეუწყობს ეროვნული ლიგის და ეროვნული ნაკრებების განვითარებასაც. ვარჯიშების უმრავლესობა ფედერაციის კუთვნილ სტადიონზე მოხდება. ჩვენი მიზანია, რომ 2024 წლისთვის გვყავდეს მინიმუმ 4000 მოთამაშე, 20 კვალიფიციური მწვრთნელი, მსაჯი და ამდენივე გუნდი“, – განაცხადა ყიფიანმა.
