ტოტენჰემმა ჟოზე მოურინიო დაითხოვა

„ტოტენჰემმა“ გუნდის მთავარი მწვრთნელი, ჟოზე მოურინიო გაათავისუფლა. ინფორმაციას ლონდონური კლუბი ავრცელებს.

„კლუბს შეუძლია განაცხადოს, რომ ჟოზე მოურინიო და მისი მთელი სამწვრთნელო შტაბი – ჟოაო საკრამენტო, ნუნო სანტუში, კარლოს ლალინი და ჯოვანი სერა დაკავებული თანამდებობიდან გათავისუფლდნენ“, – წერია „დეზების“ განცხადებაში.

მიმდინარე სეზონში პორტუგალიელი თავკაცის ხელმძღვანელობით „ტოტენჰემს“ სახარბიელო მდგომარეობა ნამდვილად არ ჰქონდა. ინგლისის პრემიერ ლიგაში კლუბს 32 ტურში 50 ქულა აქვს და მე-7 ადგილზე იმყოფება. „ტოტენჰემი“ საუკეთესო ოთხეულში მოსახვედრად იბრძვის და მეოთხეადგილოსან „ვესტ ჰემს“ 5 ქულით ჩამორჩება. „დეზებმა“ ინგლისის ჩემპიონატში ბოლო 3 მატჩიდან 1 წააგეს და ორი ფრედ ითამაშეს. ბოლო ტურში ჟოზეს ყოფილი გუნდი „ევერტონს“ ესტუმრა და 2:2 ითამაშა.

მოურინიომ „ტოტენჰემში“ 2019 წლიდან მუშაობდა და გასული სეზონი პრემიერ ლიგაში მე-6 ადგილზე დაასრულა. მისი შემცვლელის ვინაობა ჯერჯერობით უცნობია.

The Club can today announce that Jose Mourinho and his coaching staff Joao Sacramento, Nuno Santos, Carlos Lalin and Giovanni Cerra have been relieved of their duties.#THFC ⚪️ #COYS

— Tottenham Hotspur (@SpursOfficial) April 19, 2021