ახალგაზრდა და ნიჭიერი ჩოგბურთელი სტეფანოს ციციპასი ავსტრალიის ღია პირველობის მერვედფინალშია. ბერძენი ჩოგბურთელი მელბურნის კორტებზე იდეალურად გამოიყურება, თუმცა მეოთხედფინალში გასასვლელად მარიო ბერეტინისთან მძიმე ბრძოლის გადატანა მოუწევს.
იტალიელი მეჩოგნე იოლი ლუკმა არავისთვისაა და ეს მან არაერთხელ დაამტკიცა. უმნიშვნელოვანეს მატჩამდე კი ციციპასი ჩოგბურთისგან და ჩოგბურთელებისგან დასვენებას აპირებს.
„ვაპირებ თუ არა ნადალის ან ჯოკოვიჩის მატჩის ტელევიზორში ყურებას? ვერ გეტყვით, თუ სასტუმროს ნომერში საჩოგბურთო არხი იქნება ალბათ ცოტა ხნით თვალს შევავლებ, ისე კი ისტორიული გადაცემებს ვამჯობინებდი. არა საჩოგბურთო ისტორიის, არამედ ზოგადად ისტორიის. ჩოგბურთი რეალურ ცხოვრებაშიც საკმარისი დოზით მაქვს“ – აღნიშნავს სტეფანოს ციციპასი.
შეგახსენებთ, ავსტრალიის ღია პირველობაზე სტეფანოოს ტკბილი მოგონებები აკავშირებს. 2019 წელს, მელბურნის კორტებზე ის ნახევარფინალში გავიდა და თვით როჯერ ფედერერის დამარცხებაც შეძლო.