ავსტრალიის ღია პირველობაზე გულშემატკივარი უცნაურად იქცევა. ჯერ იყო და რაფაელ ნადალს ერთ-ერთმა მაყურებელმა ტრიბუნიდან შუა თითი უჩვენა, რასაც ესპანელმა სიცილით და აწეული ცერათი უპასუხა,შემდეგ კი ჯოკოვიჩის ჯერიც დადგა.
სერბმა ჩოგბურთელმა მესამე წრეში ამერიკელი ტეილორ ფრიცი მძიმე ბრძოლაში, მაგრამ მაინც დაამარცხა. სავარაუდოდ ნოლე ახალგაზრდა და ნიჭიერ ფრიცს უფრო მარტივად აჯობებდა, რომ არა მესამე სეტში მიღებული ფეხის მცირე ტრავმა. პირველი ორი პარტია სერბმა მოიგო და საქმეს გამარჯვებამდეც მალე მიიყვანდა, მაგრამ საბოლოოდ კორტზე 3 საათზე მეტის გატარება და 5 პარტიის თამაში მოუხდა.
როგორც ავღნიშნეთ, ნოლე მესამე სეტის სტარტზე ერთ-ერთი გათამაშების დროს კორტზე წაბორძიკდა და წაიქცა. მას სამედიცინო ტაიმაუტის აღება დასჭირდა. სწორედ ამ დროს, ტრიბუნაზე მყოფმა მაყურებელთა ნაწილმა ჯოკოვიჩის გაღიზიანება გადაწყვიტეს და რაფას სკანდირება დაიწყეს. მსოფლიოს პირველმა ჩოგანმა პროვოკატორ გულშემატკივარს ღიმილნარევი ცინიზმით უპასუხა.
ნოვაკ ჯოკოვიჩს ავსტრალიის ღია პირველობა 8-ჯერ აქვს მოგებული, რაც ისტორიული შედეგია. წლეულს კი სერბი წლის პირველი დიდი სლემის 1/8 ფინალში მეთოთხმეტედ გავიდა.